Schrieverij
Wednesday 27 June 2007
Beste lu,

As eerste wil ik het mit joe hebb’n over de kop van mien stukje. ‘k Wil de kop groag verandern. ’k Haar ‘t er ook over mit Jan Kiewiet. Wie kwaamn op prietproat. Moar toun ik over mien onderwaarp noadocht vond ik dat beslist gain prietproat. ‘k Verander het nou moar in schrieverij.
Woarom? Columnschrievers waarn en binn minsen as Carmiggelt van Het Parool, Piet Grijs van Vrij Nederland en nait te vergeetn Jan Blokker. Aandere krantn begonn d’r ook mit en zo kreegn wie ‘n leger van column- schrievers. Bie ‘t lezen kreegn je kromme toonn en dee het joe zeer aan oogn. Kiek moar ains in Dagblad van het Noorden, din waitn joe genogt. Dus doarom wil ik groag dat ‘t opschrift verandert. ‘n Vlag mot de loading dekkn.

Van Olaf, de promoter van het Grunnings, heb ik nog niks heurt. ‘t Zal wel kommn, hai het slim drok...

Nou wie het toch over het Grunnings hebbn wil ik nog wat kwiet. In dei mooie week in ‘t lest van meertmaond was ik aan’t grasmaain. Twij beudels op fiets kwaamn kiekn woar ik mit bezig was en wie muikn ‘n proatje. Zai in ‘t Nederlands en ik in ‘t Grunnings. ‘k Heurde aan de zinsbouw van ain dat pa en moeke mit ‘t Grunnings waarn groot brocht, moar nou heur kinder mit het Nederlands groot brochten. Ik vruig heur of zai ook Grunnings konn proaten. De aine keek mie aan en begon wat te kniezn, de aander draaide zuk om en zee teegn zien kameroad “Wat dom hè”. Doar kon ik het mit doun. Zai gingn verder mit heur fiets en ik mit mien grasmesien.

Dei lutje beudel sluig de spieker precies op de kop. Zo is’t mit onze toal. ‘t Is dom, nee je binnen dom as je Grunnings proatn. As je Nederlands proatn din binn je meer weerd, je binn din van ‘n hogere sosioale klasse. Dizze maining, misschain wat anders oetdrukt, is de doodsteek veur onze toal. Ston het Grunnings moar in hoger sosioal aanzain. Waarn d’r moar kopstukkn in onze pervinsie dei in ‘t Grunnings heur zegje deedn. Ain van onze gedeputeern prat zelfs mit ‘n soort Amsterdams tongslag en ook nog nazoal (‘n beetje neuzig).

Op radio- en tv Noord huivn wie nait te reekn. Dei speuln wat Nederland 1,2 en 3 noa. Aoftrekseltje van programmaas oet Hilversum. ‘t Is nait anders.
Wat luu bie radio Noord gebruukn het Grunnings moar kommn nait verder dan wat handelsraizigers humor en wat gebler.  

Wat mie veuraal stekt dat binn de vroaggesprekkn mit geboorn en getoogn Grunnegers. Lu mit ‘n goud verhoal goan in het Nederlands heur verhoal doun. Deedn zai ‘t in Grunnings din kwam heur verhoal veul en veul beter over. ‘k Hol d’r moar over op, ‘k zit al weer goud op mien stokpeerd. Lest zee d’r ain teegn mie “hol d’r moar mit op”. ‘t Is trekkn aan ‘n dood peerd. Moar ik geef de moud nait op, ik zet deur.

Nog wat neis over onze draaimeuln-‘t gait goud, 23 juni hebbn wie feest en de meuln draait.

P/S 1.   Kreeg nog bericht van Olaf. ‘k Dou nait wat hai zegt. ‘k Blief schrievn zo as ik schrief, mit ‘n komma en zunder e. ‘k Schrief zoas ik denk en door moutn joe ‘t moar mit doun.

P/S 2.  ,k Haar vergeetn om Thessa ‘t stukje te geevn. Moar gain man over boord. Oet Amerikoa komt mien stukje deur internet toch op tied.
(Dhr. Godlieb was bij zijn dochter Jantje op bezoek in Eden Prairie, Minnesota red.)

In de supermarket van Eden Prairie pruit ik mit ain van de medewaarkers in het Grunnings.
‘t Is woar, mit ‘t Grunnings kinn je overaal terecht moar doar is ain moar bie – zai begriepn joe nait – moar dat ligt nait aan ‘t Grunnings.
                                    
Godlieb

 
< Vorige   Volgende >