Ontvangen bericht...
Thursday 25 September 2008

Soms krijgen we via de website de leukste reacties! Onderstaand bericht, naar ons gemaild door Jannie Bunk-van Buuren, willen we jullie niet onthouden:

Ha Midhoesters!

Geweldig initiatief om met Midhoezn meer aan de digitoale weg te timmern. Mien zus Anje zee aal: most es kiekn op website Midhoester. Mooi man! Zoi woit hou mien Midhoester bloud altied nog stroomt, dat goit ook nooit over, ook aal woon ik alweer zoveul joar in Baarn.

Omdat ik trouwd bin met n' Bellingwolder, binn wie altied grunnegs bliemn proatn netuulek. Woarom zovve noit, zo binn wie en 't zol roar weezn as we dat noit deedn. Wuln joe trouwns wel aan meester Godlieb zeggn dat het ons abmoal noit oetmokt hou hoi grunnegs schrieft?! Wie binn grunnegers en goin froizn, das n hol groot verschil. Onze toal wordt bienoa in elk deurp weer aans oetsprookn. Mien man Koos haar as Bellingwolder soms aandere oetsproakn as ik as Midhoester, mor dat is toch geweldig ! Dat bewiest hou riek onze toal is. Zolaang wie mekoar mor begriepn in ons fonetisch geschrief, is der niks aan de haand. Het leezn duurt allooin soms wat laanger, mor dat hebn joe ons ook leert meester Godlieb: goud leezn zodat je het goud begriepn want din kinn je dervan genietn. Dus meester Godlieb, blief veuraal lekker schriemn.

Ik heb hier in Baarn wel ois preboird oet te leggn wat neutn schoitn was, met Poasn. Ik zee altied neutn snittern, Koos zee altied neutn riestern. Eigelk is dat Poaske-spelletje zo grunnegs dat je het noit oins vertoaln kinn, dus zeg ik mor teegn de hollanders hier: dat we noten hebben gesnitterd ...... din most heur kiekn zoin ! Ze worn glad jaloers din.
Mooi he, dei toal van ons !
Dou ik op mien waark in het zoiknhoes van Amersfoort met Koos aan telefoon was en ik iets zee van : kiek doe mor oet doe, dou dochtn mien collega's dat ik Moluks pruit. Din vuil ik mie as Midhoester zo riek. Joe toch ook !

Groag wor ik lid van joen kraant, zodat ik alles goud metkrieg van datgene woar ik mie nog altied zo verbonn met vuil, Midhoezn. Dei roots haar ik, dei heb ik en dei hol ik.

 
< Vorige   Volgende >